كشف الفنان أحمد سعد عن تعمده القيام بتصرفات غير تقليدية بهدف تصدر التريند وجذب انتباه الجمهور، موضحًا أن طبيعة الحياة الفنية الحالية تفرض على الفنان البحث عن طرق مختلفة للفت الأنظار، حتى لو كانت مثيرة للجدل.
تصريحات عن التريند والاعتذار
قال سعد خلال تصريحات تليفزيونية: "أنا ساعات بعمل حاجات غريبة، وفي حاجات بعملها عشان تطلع تريند، لو لبست بدلة وكرافتة وبقيت شيك، محدش هيتكلم عليك، الناس بقت عاوزة كده، وده بقى جزء من حياة الفنان". وأضاف أنه يحرص على الاعتذار عندما يشعر بأن تصرفاته تجاوزت الحدود، قائلًا: "بس لما الناس يشوفوا إن في حاجة غلط، بطلع أعتذر".
إشادة ببهاء سلطان
تحدث أحمد سعد عن علاقته بالفنان بهاء سلطان، مؤكدًا أن صداقتهما تمتد لسنوات طويلة، وأنه يكن له محبة وتقديرًا كبيرين لما يتمتع به من صفاء نفسي وعدم انشغاله بالمنافسات الفنية. وقال خلال استضافته في برنامج "مع كامل احتياطي": "بهاء أحسن واحد في الكون والله.. عايز أقولك أنا كل ما أروح جامع أصلي الفجر ولا حاجة يقولولي بهاء كان هنا والله العظيم".
أضاف: "أولًا شخص مالوش علاقة بحد في عالم موازي، لا بيحقد على حد ولا بيحسد ولا شايف إن في منافسة، أنزل أغنية أنجح ولا ما أنجحش.. هو مثال لكلمة سلمها لله". واختتم قائلًا: "أنا بالنسبة لي ما أقعدش أسمع أو أتبسط إلا من بهاء سلطان، وكمان صوته في الحقيقة جبار، إحنا صحاب جدًا من سنين.. ساعات كنا نمشي بالعربية ونقعد نغني كده بس لبعض".



